考驗與賭博

Double L 嘅老闆關人忍仕每年都會放暑假，仲要係一、兩個星期嗰隻。大家就估，喺呢兩個星期 Double L 會點呢，會唔會畀達達大師睇穿佢無料到，掉走佢呢？！

之前我啲老闆有料，所以關人忍仕可以好放心咁經常放假，之但係近幾個月都好似無聽見過！無他，如果 Double L 有咩閃失，佢都唔會好過，所以佢宜家咩都旁住佢，咩都要睇過、聽過先敢上呈畀達達大師。

所以如果關人忍仕放咗假，Double L 可唔可以支撐得住，對佢嚟講係一個考驗，對關人忍仕嚟講就係一場賭博！會唔會到最後關人忍仕今年唔放暑假呢？如果真係，咁出年又點呢？

強項

如果有一日你老闆唔再敢叫你做野，你估會係點呢？！

呢幾日都無同 Double L 講過啲咩，因為講唔夠三句我就開始聲線提高，再講我就會起火！所以我最近好悠閒，只係跟返之前跟開嘅野，而其他人就慘啲，日日畀佢要求 weekend 返嚟，雖然無人理佢，但係咁都幾煩！

之前講過要發掘你唔順超嘅人嘅優點，我地最近發現 Double L 嘅一個唔知算唔算優點嘅強項，就係面皮夠厚。唔理你同佢講咩，總之佢為咗要交功課，點都要講到你認同佢又或者肯幫佢為止，死未！

你揹唔揹得起？

如果你老闆問你：「你揹唔揹得起？」嘅時候，你會有咩反應呢？我就諗．．．你估你唔使死！

今日 Double L 就真係咁同我講，我就回佢一句：「點解揹唔起？！」

有啲人真係好傻，以為自己啲手下可以幫佢受，又或者拖多幾個人落水就會無事。真係當人地傻，邊個要揹自有公論。我講一句「我揹」有幾難，但係有起事嚟，佢係責無旁貸嘅。

好多野都無絕對嘅啱同錯，過唔過到關係睇你點解釋同敢唔敢去成承擔。又無能，又無膽，你點玩落去？！

怪雞公司

呢個世界有啲公司好奇怪，當佢地覺得一個員工好做得野，但係又因為工作量太大而唔做得唔開心，處理嘅手法竟然係 extend 佢嘅 probation 而唔係立即加薪留人。佢地嘅理由係等大家再觀察一吓對方係唔係啱！呢啲好明顯係撇女嘅技倆！

又有公司到今時今日仲會怕啲 sales 同啲客太熟而耍手段。記得我仲係做客嘅時候，最討厭就係轉 sales，因為所有野都要由頭再講一次！

更更神奇嘅係喺香港做中國人生意，但係就請幾個唔識睇中文嘅外籍人士（但又唔係鬼喎．．．？！），全公司嘅 working force 就得２個係香港人！仲未夠死喎，公司話事嘅係遠在新加坡，連 PRC 係咩都未識嘅人！

以上公司雖然如此不濟，但又實實在在咁賺緊大錢。呢樣野令我對過往學嘅 business management theory 開始有所懷疑，原來亂嚟都可以賺到錢，唔怪得當年 Bill 有書唔讀去搞機啦！

邊個先係老闆呢？

今日同 Double L 去開會。與會人士仲包括其他衙門嘅同僚。

呢個其實係某個 project 嘅 monthly meeting，以前我係唔會去嘅，因為大部份嘅議題都係唔關我事，所以老闆去聽完就算，有需要先同我講幾句。Double L 最初幾個月都係自己去嘅，但自從上個月起就叫我同佢一齊去。最主要嘅原因係佢唔明人地講緊咩！

本來同佢去開會並唔係咩大不了嘅事，呢啲係我工作嘅一部份，非常樂意去。之但係本來應該由佢去會報同回應嘅野宜家都由我去答就有啲唔多啱規矩！結果佢全個會一句有意思嘅句子都無講過！

有時我會覺得我先至係老闆．．．

峰回路轉

早幾日先同大家講隔離山寨個 contractor 未續約，估佢凶多吉少，點知昨日就收到消息知道佢已經績咗約，恭喜恭喜！

至於仙姐嘅接班人就喺噚日特然出現，嚟做 hand over！到現時為止，Double L 仲未正式同大家交代事件．．．department head 喎！

仙姐再見

唔知大家知唔知，係官府要升職，係要經過一個 acting 嘅階段，只要你老闆唔寫死你，咁你就可以升。而仙姐正正就係喺 acting 嘅階段，可惜佢忍受唔住 Double L，終於放棄升識嘅機會，唔再 act 呢個位，離開我地！

雖然仲未出 posting，但係已經去咗新衙門做 hand over，估計呢個月內會走人。至於替補人選就好似未有．．．

喺到做咗七年幾嘅施主任原本希望今年年中可以掉走，照咁睇嚟都好渺茫！

賊喊捉賊

上星期因為一啲私務，放咗一日假，而就喺嗰日，關人忍仕個秘書出咗個 email 話 security team check 到我地有兩部電腦 install 咗啲 unauthorized software，要部機個 owner 快啲 uninstall 咗佢。

呢啲野無咩出奇，久不久就會有一單，清咗就無人會追究，之但如果唔認衰呢就死喇！

今 朝一早就收到 Double L 個 email，大至係叫我地唔好 install 啲 unauthorized software 之類咁嘅野，仲叫施主任 ensure 大家唔好做。就係“ensure”呢個字令到施主任大發雷霆。原因有好幾個，而其中一個係．．．出事嗰兩部機嘅 owner 就係 Double L 自己！咁叫我地點 ensure 呢又？！

故事未完，仲有野跟尾。Double L 係 uninstall 佢啲唔知咩 software 嘅同時回咗秘書小姐一個 email 話自己月頭已經清咗啲 software。好似無咩問題呵．．．錯！首先無人知 security team 幾時做 inspection，可能只係前幾日嘅事，未清又話清咗，死罪。第二，好似無人要你回應，自己補救咗就 ok，扮勁之餘仲越描越黑，又講大話，罪加一等！

姥姥

官府內有好多身處高位，不過你永遠唔知佢平時做緊咩，又或者你唔覺得佢識做啲咩。之但係你唔知唔代表佢地無料，佢地個個都可能係身懷絕技的高手。我一直當 相信一樣野，就係佢做得你老闆，佢一定有啲野你係唔及佢嘅，例如辦事能力比你高，功力比你深厚，又或者早出世過你，刷鞋比你到加之類，總之就比你高小小 咁。

最近有位人姐使我對佢另眼相看的，佢叫姥姥。佢有無自己嘅家庭我唔知，只知道佢係唔使放工，仲鍾意５點９先叫人１５分鐘後開會！而平 時開會佢都係唔係好知發生緊咩事咁，亦唔係好知佢下面點做野，永遠都係：「我以為已經搞掂，點知你地會搞到咁複雜，唔係好簡單嘅咩．．．」有時啲野本身就 係咁複雜，以為簡單係因為你膚淺！

最近發生咗一件意外，雖然無令以上嘅結論有所改變，但係就加多咗一個註腳。意外詳情並唔重要，收拾殘局嘅技巧先至係關鍵。姥姥用佢多年作故仔嘅功力，寫出一篇亮麗嘅 email，避重就輕地把事件輕輕帶過。大家又可以安安槳槳咁生活落去．．．

唔死都無用

本來話山寨正忙緊仙姐個 project，但係 Double L 唔知發咩神經 pull 哂所有人去做另一樣野。呢單野本來好 easy，只係解下份 report 畀佢老闆關人忍仕聽，點知佢又解到亂哂龍，畀關人忍仕問得兩問就唔識答。返到嚟就當然四周圍搵人問，要知道佢老人家幾醒至得架，講極都唔明，結果．．．

正 因為佢不停問，大家就好努力咁解，越解就越發現多問題。其實份 report 係用嚟做 estimation，你知啦，estimation 唔會好準，亦唔需要好準，之但係佢老人家要求高，要大家 check 完又 check，解完又解，搞到連最好脾氣嘅鮮茄都起火，死未。

雖然我地都好明白，老闆有難，撐佢係我地嘅份內事，之但係死蠢呢家野呢就唔係話撐就撐得住，係要靠佢自己！

宜家個個都頂佢唔順，聽講關人忍仕都覺得佢唔得，要搵人昅實佢，翻睇佢做嘅野．．．唉，咁做野就死得啦！

無賴

上回講到 Double L 正想同我解釋個 staff plan 嘅時候佢個電話就響，結果到放工都傾唔成。今朝一早就畀佢捉咗去講呢單野。其實佢係無 solution 嘅，只係吱吱咗咗咁唔知喺道嗡咪。大概話呢個位就無硬，睇下有無其他位可以安置我，佢都無咩計之類嘅廢話！既然無驚喜，為有繼續做野，the show must go on！

每個有番咁上下大嘅衙門都有班好 technical 嘅人，有啲係齋吹水，有啲係落手落腳做嘅。今日被我遇到一個當中嘅無賴，或者叫爛仔。佢係要落手落腳做嗰個 level，之但係如果唔係直接關佢事或完全關係事嘅野，佢就會用一種「唔關我事，我唔理，你自己問第個啦，係咁架喇，吹咩！」嘅態度對你。今日佢又再一次用咁嘅態度去回應我嘅問題，之前已經試過不只一次，結果我好大力咁．．．cut 咗佢線，搞到全 office 嘅人都望實我！當然，最後個問題都係我自己去解決。我諗我要好好整治一下佢！

安撫

今日 Double L 終於 sense 到我睇咗個 staff plan 之後嘅後遺症。正當佢想喺傾其他野嘅同時順便安撫一下我，可惜一開始講，佢個電話就響！

其實我並唔需要佢嘅安撫，之但係我又好想聽下佢點擺平呢件事，所以當佢話想傾嘅時候，我都有啲期待。以佢嘅智慧和辦事能力，佢究竟會點做呢．．．明天續。

搵工、續約

睇完個 staff plan 之後，我一口氣 send 咗６封 application letters 出去，以示我嘅不滿！

唔知點解，我覺得越嚟越少工啱自己，我開始懷疑自己係唔係已經 out 咗！

早幾日同隔離山寨個 contractor 傾開，佢五月完約，但係宜家都未同佢傾續唔續。雖然個 staff plan 無話 replace 佢個位，不過就提都無提，所以都係凶多吉少！佢話出面唔多好景，特別係我地呢啲唔上唔落，人工又高嘅所謂中層。我好同意佢嘅講法，所以今次呢６個 applications 我都俾咗個 discount，希望騎牛搵馬。

講開呢個 contractor，佢比較唔好彩，同我同 grade，早我幾個月入嚟，但人工就低幾個％，因為我入職時已經過咗 annual review。佢上年加完都只係我加之前個數，即係永遠都遲我一年，都唔好話唔慘！

Staff Plan

今日 Double L 出咗個 email，係關於幾個山寨嘅 staff plan，佢叫我同施主任睇下有咩 task 要加。啲咁高層嘅野其實唔應該問我地，之但係老闆叫到，咪幫佢望下囉。點知被我發現原來我個位將會無咗！即係話我又將會失業！我真係好唔鍾意呢種感覺，一種徬徨嘅感覺。

我有啲懷疑 Double L 係有心被我知道我個位會唔開嘅。我諗要解釋一下，我個位係一個 contract 位，即係需要做唔哂啲野嘅時候開個位，無錢嗰時可以 cut 咗你，又或者有錢嘅時候請個 pem 嚟 replace 你，總之就係隨時都可以飛咗你又唔使負責。而今次係後者。可能佢好心等我早啲知，早啲搵工；又或者佢想提醒我佢操縱住我嘅生死，等我唔好咁吋．．．！

無論佢嘅動機係咩，有心定無意，早知好過遲知。睇嚟要積極啲搵工先得喇。

權貴恐懼症

今朝 Double L 同佢老闆去 brief 佢老闆嘅老闆達達大師，一個嚟咗一個禮拜嘅新官。其實達達大師個位都吉咗足足一年，中間有個路人甲坐咗幾個月，跟住就掉走咗，期間當然無咩建樹，其實唔留低啲ｘ已經功得無量!

講返 Double L 個 breifing，其實都好順利，只係佢老闆覺得啲 material 裡面有啲數唔多啱胃口。佢當然走返嚟問我啦，唔通佢自己識解咩．．．
「舊年個數同前幾日嗰個差好遠，點解？」
「成年咁耐喎！我地又打哂鑼鼓咁叫人地做野，個 count 大咗有咩咁出奇！」
「唔係呢，你 run 多次吖！」
「三日前 run 過，同一個 program，同一 set data，唔會唔同嗰喎！」
「唔好哩，你再 run 多次啦，你減．．．」
我無等佢講完就行咗出去，因為我覺得同佢講落去都無咩用，就照佢老人家意思再 run 多次了事。結果當然一樣啦。

我好明白點解 Doubld L 咁緊張，因為佢好不幸咁染上咗權貴恐懼症！例子有好，最近嘅有達達大師出巡事件。

話說達達大師上任第二日就去四出巡視業務。十點鐘就由秘書小姐通知各寨主老闆十點半出發，但就無交代路線同 schedule。佢就叫各人嚴陣以待，可惜等到十一點幾都未見影。就係呢個時候有個 technical support 走嚟話要整施主任個電腦，佢居然以老闆嚟巡為由，趕咗人地走！就係咁，施主任繼續 send 唔到 email，死未？！

大家要知道，老闆個位只係落兩層，即係隨時都可以上嚟巡，你驚得幾多？咁驚不如掛個噹噹喺老闆心口吖笨！

難過的日子

今日仙姐繼續放假未返，我有啲懷疑佢係唔係有咗。而施主任又因為佢個女嘅唔知咩野，一早請咗假，所以今日 office 好靜。

兩個 team leader 都唔喺到，Double L 為有轉移目標，搵阿 Ken。雖然阿 Ken 係仙姐嘅馬仔，但係唔代表佢會知道所有野，可以幫到佢幾多我都唔太清楚．．．祝佢好運。

至於我就因為最近出咗啲野被各大衙門，要求佢地幫手做啲 testing，結果我個電話就不停咁響。之前講過，我唔適合教書，因為 EQ 低，就算被 Double L train 咗半年，其實進步不多，宜家又要答衙門啲人嘅電話，真係想死！而且相信呢個只係開始，下星期將會進入接電話嘅高峰期．．．如果唔係個 AM 走咗，我諗我嘅日子會過得好啲。

Deadline

上星期一，仙姐放完佢嘅 long vacation 歸隊，而佢嘅 project 亦原封不動咁等佢返嚟！仙姐身體唔多好，可能見到咁嘅環境，立即嚇到病咗！上星期就放咗兩日 sick leave，而今個星期就．．．放哂．．．係整整一個星期的 sick leave！

正當仙姐放病假嘅同時，Double L 終於同 users 開咗個好漫長嘅會議去傾仙姐個 project 嘅 user requirement。內容講咩我唔多清楚，只知道與會人士都唔多想 make decision 所以搞咗咁耐都傾唔到野，仲好似話想大改仙姐個 draft．．．云云！

每一個 project 都有一個 deadline，而仙姐嗰個係今年九月。根據施主任估計，就算宜家 finalize 到個 user requirement，九月上都係有困難嘅。更何況要大改。如果今次個 project 有咩差池，相信 Double L 同佢老闆，仲有佢老闆個老闆都要人頭落地。可惜 Double L 好似仲未知道大禍臨頭．．．！

仙姐

最近山寨做緊一個 project，而負責嘅係一位剛升職嘅女仕仙姐。

話說個 project 係好重要，會影響整個官府嘅運作，所以好 complicated，好難搞。Suppose 寨主 Double L 應該要睇緊啲嘅。佢亦不負眾望，金睛火眼咁．．．睇實，無錯係齋睇，因為佢一啲都唔曉。仙姐為有獨力 draft 個 user requirement。雖然仙姐好努力，大家唔好忘記，仙姐都係新嚟，而且有啲野唔係佢個 level 可以話到事嘅，所以都幾無助。咁都算，居然連 sale 被大老闆都要佢去就真係有啲過份。之但係 Double L 繼續唔理官場規律，硬要仙姐越三、四級去同大老闆解畫，結果仙姐一怒之下放兩個星期大假同老公仔去澳洲嘆世界，一於小理。

Double L 當然唔會自己執手尾。一腳就將個波交咗被大內總管施主任！施主任當然鬼殺咁嘈，可惜於事無補。而我當然唔會插手，君子不立危牆下，明知係爛攤子，都係避之則吉好啲。

講返仙姐，其實我都幾佩服佢，話放假就放假，仲要係兩個禮拜，勁！

Assistant Manager

上星期，跟咗我兩年幾嘅 AM 走咗，真係有啲唔捨得。佢係一個好做得野嘅後生仔，都幾聰明，好有交帶，只係返工比較遲．．．每日遲一粒鐘左右！不過我唔，mind 因為我要嘅係 result 而唔係過程，以前某人返 7-11 咪又係得個吉。

Double L 話會再請人，但係我仲未見到個 ad 出街，我諗到我手頭上啲 project 完哂都未有人返工！或者我應該去習慣一下政府嘅效率．．．一個世上最有效率嘅官僚架構．．．！

喺我呢個山寨仲有兩個 AM，男嘅叫 Ken，女嘅叫小婦人，都係啲好乖嗰類後生仔。佢地唔係我條 team，所以只係需要時借用一下，不過就會一齊食同玩。

其實呢到嘅 AM 係無咩權，更唔好講話有靚跟，錢就更加唔使提，只係用個好啲嘅 title 去方便請人而已。所以請到嘅都係啲好 green 嘅人，不過之前啲老闆叻，請返嚟嘅都係啲肯做，同 smart，最多講兩次就明嗰隻。以咁嘅人工其實係留唔到佢地嘅，所以我個 AM 走，我係有啲高興，至少知道佢會有更好嘅前途，唔似得我咁！

Double L

噚日講到老闆 Double L，其實呢個名係我改嘅。Double L 即係有兩個 L，第一個係 Low Ability（低能）而另一個係 Low Sense（低B）！

同一個 term 解一次就明而且又記得用返出嚟嘅係聰明人；要解二次先明嘅都可以叫做醒目仔；解到第三次就真係一般咗小小，有啲不能接受；而要解四次或以上嘅，除咗用低能嚟形容之外，我實在諗唔到更好嘅詞語！有幾句說話我最近經常聽到．．．
「你 brief 一下我」（已經白紙黑字寫得好清楚，１＋１＝２，仲有咩好 brief 呢？！）
「你解解被我聽」（前兩日先解咗一次，又解！）
「你咁講我咪明囉」（不過過幾日又問過！）

已經半年，我開始習慣每件事都要解釋幾次，仲要用好溫柔嘅語氣去講，一定唔可以動氣。以前我會覺自己唔適合教書，但係宜家應該可以喇！

官場之道

噚日講完舊老闆豪擲四萬得以逃離這個鬼地方，今日講吓誤墮地獄的新老闆 Double L。

要知道每個衙門對唔同人有唔同待遇。簡單嚟講如果你喺嗰個衙門係少數的專業人仕，如醫生、律師、會計師、IT人之類，你所得到嘅尊重係非同小可。之但係如果你身處喺自己職系嘅衙門咁就唔同講法。雖然你係律師，不過你老闆和你老闆個老闆都一樣係律師，你，只係佢地嘅其中一個，無咩特別。而 Double L 就係後者，而且係細嗰隻！

有啲流落在外嘅人可能會覺得掉返總部係升職嘅先兆，well，某程度上係啱，只要你真係有能力同頂得順！野你唔一定要識做哂，但係一定唔可以被人知道你唔識。Double L 就唔多明白呢個官場之道，結果無論係佢啲靚又或者係隔離山寨嘅寨主都唔多被面佢，當佢傻仔。其實都唔可以怪哂佢，鬼叫佢之前嗰幾手都咁叻咩！

自由的代價

大家好，我叫肥仔，一個三字頭的男人。依據時下的一些定義，我應該算是一個中產。雖然我唔多覺得自己的生活質素似個中產，之但係咩社會福利都無嘅特質就令我不能否認自己是個中產！

SARS 之前我係某大公司嘅部門主管，可惜後嚟執咗！宜家我喺政府某部門做個唔上唔落的二打六，每日嘅工作就係諗吓嗰日有咩好做！

在政府，轉老闆是常事，佢地通常坐三、四年就掉走，不過我比較好彩，短短兩年就換咗三個。對上一個坐咗半年就頂唔順，使橫手掉咗自己去英國 training 三個月，代價係自己貼四萬幾嘅食宿，換嚟可以離開嚟個鬼地方。值唔值就見仁見智。不竟自由是要付出代價的！